Mar 13 | MHL | STEP | Aria Yeesus tempel koora-pa orop ikiwem-ikaeya ona teeria mua oko-ke koora nain urufami maakek, “Somek mua, urufe. Tempel koora faa, nomon mane-maneka, ne pika bala eliw akena.”

Mark 13

Yeesus maek, tempel koora ikoka samorarinon

(Matiu 24.1-2, Luk 21.5-6)

1 Aria Yeesus tempel koora-pa orop ikiwem-ikaeya ona teeria mua oko-ke koora nain urufami maakek, “Somek mua, urufe. Tempel koora faa, nomon mane-maneka, ne pika bala eliw akena.” 2 Naeya maakek, “Ae makena, no koor maneka fain urufap main-i? No koora urufin fain ikoka nomona kuisow nomon oko iinan-pa me ikainon, weetak. Pika nain ikoka iiwawun te-teekiwkin ururomakinon.”

Yeesus pina unowa ikoka imenarowa nain maek

(Matiu 24.3-14, Luk 21.7-19)

3 Aria Yeesus Oliw ema urupep nan pokap ikua. Ema nain tempel koora okaiwi-pa ikua. Nan pokap ikaeya Pita, Yems, Yon ne Andru wiam erepam o wiar ekap nokaremik, “Baliwep yia maake, no maa yia maaken nain iikamin akena-ko imenarinon? Maa mauwa-ke kiikir imenareya i ilenap maiyen, no maa maen nain naneka.”

5 Naeya wia maakek, “Ni maa uru-urufami ikeka, oko mua oko-ke nia peeskimikuan. 6 Ikoka mua unowa ekapemi yo unuma efa unufami maikuan, ‘Yo Krais-ke’. Naap onami emeria mua unowa wia peeskimikuan. 7 Aria irakowa feekeriw miimowen ne wi epasia-pa irakowa meta wiar miimowen. Ni nain me keker opaka. Makena, sira nain ikoka owow unowa pun wiar imenarowa-ke. Nain miiwa weeserowa epa eewuar ikua. 8 Owow unowa ikoka wi-wieniw irakikuan ne owow oko saria-ke owow oko irakowa fee-feekeriw arikuan. Miiw unowa weniw maneka imenarinon, ne maa ofofona pun imenaromakinon. Nain yoowa aawowa epa onoma wuak nain-ke. Wi emeria muukaru naep sirirowa onoma wuimik naap.

9 Ne iir nain ni niam uru-urufap. Ikoka yo muuta nain mua papako-ke nia opap lotu koor kemena-pa sarua niarikuan. Ne opora-pa nia wuami anim onoma ne saria maneka wapena-pa nia wuikuan. Naeya wi mokoka-pa yo opor makena nain wia maakowen. 10 Sira nain ewur me imenarinon, yo opor eliwa nain miiw unowa iiwawun pepek wiar ikiweya nain imenarinon. 11 Aria nia opap opora-pa nia wuiwkin ni keker opap kema unu-unowa feenap me wueka, ‘I opora kamenap maiyen noma?’ Iir nain Mua Maneka Ewar-ke kema nieya wia maakowen. Moram opora nain me niena kakeniw opora-ke, Ewar Eliwa-ke kema nieya maowen.

12 Ne ikoka yo muuta nain mua oko-ke ona wiamun e weepe opap pikiweya wia ifakimikuan. Ne wiawi wiena muuka naap wia onikuan, ne muuka wiipa-ke wiena onak wiawi sira naap wia onikuan. 13 Ne mua unowa yo muuta nain nia iririmem-ikaikuan. Ne ni kekanep yo opora baliwep ookiman nain anane eliw ikowa imenowen.”

Maa samor akena imenarinon

(Matiu 24.15-28, Luk 21.20-24)

14 Ne aria Yeesus-ke nainiw maek, “Ikoka maa samor akena tempel koora-pa me ikowa nain neek iimarep ikaeya urufowen.” (Ni opora fain unufap kemena aaweka.) “Maa naap imenareya wi Yuudia kame-pa ikemik nain baurarep ema urupomakuk. 15 Wi mua koor iinan-pa ikok-na neekeriw bauraruk, koor kemena ikiwep maa unowa me aawuk. 16 Ne wi mua manina-pa ikok-na owowa kirep ekapep konim kuruma me aawuk.”

17 “Wiisak aa, wi emeria urom onaiya, ne muuk wesusa onaiya ikemik nain kamenap arikuan? 18 Naapeya ni Mua Maneka fariwkin maa samora nain dabel saana-pa me imenarinok. 19 Moram sirirowa samor akena imenarinon. Nain iiriw miiwa fain imenaremi maa naap-ko me imenarem-ikua, iir nain iiwawun imenarinon. Imenareya nain ikoka nainiw weetak. 20 Wi yoowa aawow epa nain Mua Maneka-ke ona teeria wia nanikap-puak nain wia kema suuwap epa samora nain ara-pa puukinon. Me puukekak-na mua kuisow me ikekamik.

21 Epa nain mua oko-ke nia maakikuan, ‘Krais faneka,’ e ‘Eenan ikua.’ Naap nia maakiwkin-na me wia miimeka. 22 Moram mua unowa wadolalemi yo Krais-ke naikuan. Ne papako-ke wadolalemi yo profet-ke wiam naikuan. Naap maemi mua unowa wia mufemi maa miililina sira-sira imenam-ikaikuan. Naap onami Mua Maneka ona teeria wia nanikap-puak nain pun wia peeskimu naep onikuan. 23 Naapeya ni maa uru-urufap. Maa unowa nain iiriw nia maakurumem.”

Yeesus ona wame maek, Mua Muuka nainiw ekapinon

(Matiu 24.29-31, Luk 21.25-28)

24 “Aria epa samora nain weeserem-ikaeya ama umep kokoma teninon ne siiwa pun me wilininon. 25 Mokoma-ke tenep ururomakinon ne aapereka iinan maa unowa kekekrarinon. 26 Iir nain Mua Muuka ona kekanowa ne mia parina onaiya maa ipisia-pa orom-ikaeya urufikuan. 27 O ekapemi ona ensel wia sesekeya miiw unowa ikiwep ona iiriw wia nanikap-puak nain wia aawep wia fiirimikuan, miiw okaiwi-pa iwap ikip miiw okaiwi-pa.”

Yeesus nomokowa fik maemi ona ekapowa epa nain maek

(Matiu 24.32-35, Luk 21.29-33)

28 “Aria ni nomokowa fik urufap kema aaweka. Nomokowa nain gulowa enuma mikami ifa wueya urufap maiman, ‘Aa, ama saana mamaiya arek.’ 29 Sira naap, maa nain naap akena imenareya urufap kema aawep maowen, ‘Aa, Yeesus nainiw ekapowa mamaiya akena arek.’ 30 Naapeya yo maken akena nia maakiyem, wi teeria fain mua papako me umowa ikaiwkin maa nain imenaromakinon. 31 Aapereka miiw onaiya ikoka mesenalinon, ne yo opora-ke me mesenalinon, anane naap ikainon.”

Epa kereriya nain mua me amisaremik

(Matiu 24.36-44)

32 “Maa imenarowa epa kain-pa imenarowa nain mua me amisaremik. Wi ensel pun me amisaremik ne Muuka pun me amisarek. Auwa ona waisow amisarek. 33 Naapeya ni maa uru-urufami ikeka, momor maneka me ikeka. Moram ni maa nain imenarowa fofa me amisareman.

34 Nain feenap saarik, mua oko owow oko epasia ikiwekam naep ona uuwow mua wia maakek, uuwowa ononer wiemi baliwep uuwam-ikauk naep. Ne koor urufow mua koora baliwep urufam-ikainok naakek. Uuwowa wiep-puap ikiwok. 35 Naapeya nis pun wi uuwow mua saarik maa uru-urufami ikeka. Koor onoma iikamin ekapinon nain me wiar amisareman. Urera ekapinon-i, uura aara farem-ikaeya-i, e epa wiiwim-i. Oko ni uuwow mua inep ikemik naap ikaiwkin ekapinon. 37 Yo opora nia maakiyem fain emeria mua unow onaiya nia maakiyem. Naapeya ni uru-urufami ikeka.”